ILOILO CITY- Hugot nga ginapamatukan sang mga residente sang Riverplains Relocation sa Barangay Lanit, Jaro, Iloilo City ang ginapahayag nga pagpahalin sa ila agud hatagan ligwa ang pagtukod sang tenement ukon condominium type nga residential building.
Sa interview sang Bombo Radyo kay Red Jumawan, iya ginpahayag nga sa sulod sang isa ka dekada nga pag-istar sa lugar bilang relocatee, madamo na sila sang ginpundar sa ila puluy-an.
Suno kay Jumawan, wala man sila sang iban nga kadtuan kun pahalinon sila sa lugar.
Dugang niya, maapektuhan gid ang ila pagsinalayo kag palangitan-an.
Nagpangabay ini sa Iloilo City Government nga mangita na lang sang iban nga area nga patindugan sang bag-o nga residential building.
