ILOILO CITY- Natalana ang end-of-school-year rites sang Department of Education para sa school year 2022-2023 sa Hulyo 10 tubtob Hulyo 14, 2023.
Ini ang may tema nga “Gradweyt ng K to 12: Hinubog ng Matatag na Edukasyon” sa idalom sang DepEd Order No. 009 series of 2023 nga pirmado ni Vice President kag Education Secretary Sara Duterte.
Sa interview sang Bombo Radyo kay Mr. Hernani Escullar, Jr., spokesperson sang Department of Education- Region VI, iya ginpahayag nga magapatigayon ang ahensya sang full face-to-face moving up kag graduation ceremonies.
Suno kay Escullar, indi mandatory ang pag-obserbar sang physical distancing kag pagsuksok sang face mask sa seremonya.
Ginpahayag dugang sang natungdan nga ginadumilian ang tuman nga pag-gasto ukon overspending sang mga attire ukon sa engrande nga mga venue, amo man ang pagsukot sang ano man nga sahi sang graduation / moving up fee sa mga estudyante.
Samtang, gintugutan naman ang mga graduates kag completers nga magsuksok sang toga ukon sablay.
Mangin casual ukon formal wear ukon school uniform naman ang ginarekomendar nga moving up/graduation attire.
Hugot naman nga i-monitor sang ahensya ang mga eskwelahan nga magalapas sa guidelines, apang wala man sang nagakaigo nga penalidad diri.
