ILOILO CITY- Nagapati ang Chairperson sang Committee on Public Order and Security sa Sangguniang Panlalawigan nga wala na natahap kag nahadlok ang mga durugista subong nga tion bangud liwat na naman nga nagduging ang iligal nga droga.
Ini kasunod sang nangin pahayag ni Iloilo Police Provincial Office Director PCol. Ronaldo Palomo nga makaalarma ang iligal nga droga sa probinsya sang Iloilo.
Sa interview sang Bombo Radyo kay Iloilo 2nd District Board Member June Mondejar, iya ginpahayag a sa idalom sang administrasyon ni anay Presidente Rodrigo Duterte , apisar nga wala mapapas ang iligal nga droga, masiling niya nga naghagan-hagan ini.
Suno sa iya, pagpanghangkat ini sa subong nga administrasyon ni Presidente Ferdinand Bongbong Marcos Jr. agud mapa- improve ang kampanya kontra iligal nga droga.
Kun sadto anay suno sa iya, nagakahadlok pa ang mga durugista nga magpadayon sang ila ilegal nga aktibidad, apang sa subong daw kaangay nga amat-amat na nga nagakadula ang kahadlok nga ila nabatyagan amo na nga liwat nagduging naman ang mga naga engage sa iligal nga aktibidad.
Panugyan niya nga dapat may yara sang epektibo nga estratehiya ang mga kapulisan amo man ang Philippine Drug Enforcement Agency agud nga ma address ini nga problema.
