ILOILO CITY- Nagapanawagan ang Iloilo Provincial Health Office sa mga ginikanan nga maghingagaw nga pabakunahan ang ila mga kabataan nga nagaedad lima ka tuig panubo batuk sa measles, rubella kag oral polio.
Magatakop ang supplemental immunization subong nga adlaw, Hunyo 15, matapos nga gin-extend ini sang Department of Health bangud sa gamay nga vaccination turn out sa mga kabataan kun sa diin kutob lang kuntani ini sang Mayo 31.
Sa interview sang Bombo Radyo kay Dr. Maria Socorro Quinon, head sang Iloilo Provincial Health Office, iya ginpahayag nga yara pa lang sa 88.19% ukon 142,491 ka mga kabataan ang nabakunahan.
Suno kay Quinon,kinahanglan pa sang probinsya nga mabakunahan ang 10,997 ka mga kabataan agud nga malab-ot ang 95% nga target population.
Base sa data sang Iloilo Provincial Health Office, 16 pa lang sa 43 ka mga local government units ang nakalab-ot sang 95% masobra nga total accomplishment.
Ini ang ginalakipan sang Batad, Sara, Lemery, Sta. Barbara, Mina, San Enrique, Tigbauan, Concepcion, Barotac Viejo, Miagao, Guimbal, Barotac Nuevo, Dingle, Leganes, San Dionision, kag Tubungan.
Ginpasalig sang natungdan nga safe ang vaccine kag napamatud-an na ini nga maka-proteher sa mga kabataan.
