ILOILO CITY- Gin-dismiss sang Office of the Ombudsman ang pila ka mga kaso nga ginpasaka batok kay Iloilo City Mayor Jerry P. Treñas.
Si Mayor Treñas ang nagpangatubang sang tatlo ka separado nga complaints nga ginpasaka ni former City Civil Registrar Romeo Caesar Manikan Jr. kag former City Health Officer Bernard Caspe.
Si Manikan ang nag-file sang criminal complaint para sa usurpation of authority or official functions, kag administrative complaint para sa grave misconduct kag grave abuse of authority batok kay Treñas kag kay Assistant Department Head Cherrie Ampig sang Septyembre 16, 2019.
Ini nag-ugat sa kaso sang isa ka empleyado sa City Civil Registry Office nga gin-assign sa Calajunan Engineered Sanitary Landfill facility.
Nakit-an sang anti-graft office nga wala sang bastante nga ebidensya para sa grave misconduct kag abuse of authority or oppression gani gin- dismiss ang amo nga mga kaso.
Ang isa pa ka complaint ang ginpasaka ni Manikan sang Nobyembre 13, 2019 batok sa alkalde kag kay City Legal Officer Edgardo Gil para sa graft and misconduct charges sang siya ang ginpahalin bilang department head sang City Civil Registry Office kasunod sang misconduct case batok sa iya.
Suno sa Ombusdman, kulang sa probable cause ang criminal charge kag kulang manang ebidensya sa administrative complaint.
Sa isa pa ka decision, ginbasura man sang anti-graft office ang misconduct charges nga gin-file ni Dr. Caspe sang Septembre 4, 2020 batok kay Treñas kag Khrystyl Marie Lampa bangud man sa kakulang sa ebidensya.
Si Caspe ang ginkakas sa pwesto bangud sa gin-alegar pagkumiter sang gross immorality kag abuse of authority.
