ILOILO CITY- Padayon pa ang imbestigasyon sang otoridad may kaangtanan sa pagluthang-patay sa anay punong barangay kag subong barangay treasurer sang Caboloan, Leon, Iloilo.
Ang biktima amo si Teresa Amualla, 59-anyos, residente sang Barangay Caboloan, Leon samtang wala pa matumod ang kriminal nga nagtiro sa iya.
Nahibaluan nga nasapwan nga wala na sang kabuhi sa waiting shed sa Brgy. Bacolod sa amo nga banwa ang biktima.
Sa interview sang Bombo Radyo kay PCapt Rodel Pasion, Chief of Police sang Leon Municipal Police Station, iya ginpahayag nga nagatindog sa waiting shed ang biktima agud maghulat sang salakyan sang ginpalapitan ini sang suspetsado kag gintiro.
Patal nga pilas sa ulo ang naagom sang biktima.
Suno naman sa panaysayon sang nakakita sa krimen, ang suspek nagasuksok sang itom nga t-shirt kag maong nga dilargo, kag nagataas ini sang 5’3″ tubtob 5’6″.
Madasig nga nagpalagyo ang suspek sakay sa motorsiklo.
Gindala pa sa Leon Health Center ang biktima apang wala na natabangan pa.
