ILOILO CITY- Ginkalipay ni Iloilo City Mayor Jerry P. Treñas ang pag-dismiss sang Office of the Ombudsman sang pila ka mga kaso nga ginpasaka batok sa iya.
Si Mayor Treñas ang nagpangatubang sang tatlo ka separado nga complaints nga ginpasaka ni former City Civil Registrar Romeo Caesar Manikan Jr. kag former City Health Officer Bernard Caspe.
Si Manikan ang nag-file sang criminal complaint para sa usurpation of authority or official functions, kag administrative complaint para sa grave misconduct kag grave abuse of authority batok kay Treñas kag kay Assistant Department Head Cherrie Ampig sang Septyembre 16, 2019.
Ang isa pa ka complaint ang ginpasaka ni Manikan sang Nobyembre 13, 2019 batok sa alkalde kag kay City Legal Officer Edgardo Gil para sa graft and misconduct charges sang siya ang ginpahalin bilang department head sang City Civil Registry Office kasunod sang misconduct case batok sa iya.
Si Caspe naman ang nag-file sang misconduct charges sang Septyembre 4, 2020 batok kay Treñas kag Khrystyl Marie Lampa.
Suno sa Ombudsman, wala sang bastante nga ebidensya nga napresentar ang mga tagreklamo.
Sa interview sang Bombo Radyo kay Treñas, iya ginpahayag nga nagapakita lamang ini nga magagwa sa gihapon ang kamatuoran.
Ginpahayag sang alkalde nga apisar indi ini madumot, bukas siya sa posibilidad nga maghimo sang legal nga tikang batok kanday Caspe kag Manikan.
