ILOILO CITY- Mas pabaskugon pa sang Iloilo Provincial Government, Iloilo Police Provincial Office kag mga stakeholders ang kampanya kontra sa iligal nga droga.
Ini kasunod sang nangin pahayag ni Iloilo Police Provincial Office Director PCol. Ronaldo Palomo nga makaalarma ang droga sa probinsya.
Sa interview sang Bombo Radyo kay Governor Arthur Defensor Jr., iya ginpahayag nga nagakadapat ang “whole province approach” agud nga mapapas ukon mapahagan-hagan ang iligal nga droga.
Nahibaluan nga ginhiwat ang Provincial Peace and Order Council Meeting nga gin-updan sang nagkalain-lain nga ahensya sang gobyerno.
Nagalaum ang gobernador nga madeklara nga drug-free ang 1,721 barangays sa probinsya sang Iloilo.
Base sa data halin sa Philippine Drug Enforcement Agency (PDEA) Barangay Drug Clearing Program, 98.55% na sang 1,721 barangays sa probinsya ang makabig nga drug-free.
