ILOILO CITY- Ginahulat pa sang Department of Agriculture Region 6 ang blood sample sang mga baboy nga ginapatihan nagpositibo sa African Swine Fever sa Hamtic, Antique.
Ini matapos nga nag-issue si Hamtic, Antique Mayor Julius Pacificador sang Executive Order No. 32 nga hugot nga nagadumili sa pagpatay, pagpasulod, kag pagbaligya sang pork meat kag pork products matapos ang mga report sang nagkalamatay nga mga baboy sa pila ka mga barangay sa banwa sa diin epektibo ini sang Hunyo 5.
Sa interview sang Bombo Radyo kay Dr. Jonic Natividad, head sang Regional Task Force on African Swine Fever kag sang Regulatory Division sang Department of Agriculture Region 6, iya ginpahayag nga nakig-angot na ini sa local government unit sang Hamtic, Antique agud makahimo na sang nagakaigo nga tikang sa problema.
Suno kay Natividad, nagakadapat nga indi maghatag sang kumpiyansa ang mga pumuluyo sa plastada sa probinsya sang Antique matapos wala pa sang kumpirmasyon sa presensya sang nasambit nga balatian.
Sa subong, may yara na sang ginpahamtang nga mga border control ang mga Local Government Units sa probinsya sang agud malikawan ang paglapta sang virus.
