ILOILO CITY – Mahibaluan na subong nga adlaw ang pamatbat sang syudad sa traffic enforcer nga nagpahog sa taxi driver sa dalan Delgado, Iloilo City Proper kun sa diin nakuhaan sang video ang amo nga hitabo.
Ang enforcer amo si Dominador Regala samtang ang driver amo si Wilmer Cabilitasan.
Sa interview sang Bombo Radyo kay Mr Jeck Conlu, pinuno sang Public Safety and Transportation Management Office, iya ginpahayag nga nagsapol ang disciplinary board agud nga mag-deliberate sang sanction batuk sa enforcer kag ipasa sa opisina ni Iloilo City Mayor Jerry Treñas para sa approval.
Base sa imbestigasyon sang talatapan, nagagwa nga naglapas sa protocol ang enforcer sa pag-handle sang kaangay nga hitabo.
Suno kay Conlu, antes ang komprontasyon, ginpahayag sang enforcer nga naga-ugtas na siya sa pasaway nga mga driver bangud nga nagaliko sila sa gihapon apisar nga may traffic cone sa lugar.
Ginpahayag pa sang enforcer, ginpa-untat niya ang driver apang nagdiretso lang ini.
Suno naman sa driver, hinali lang nga naglusot ang enforcer kag wala niya ini nakita.
Gin-ako man sang enforcer nga ginsipa niya ang taxi unit sang driver.
Paathag ni Conlu, dapat nga wala ginarespeto sang enforcer ang mga driver kag ipaathag sang maayo kun may yara gid sang ginlapas nga ordinansa.
Sa rason naman sang enforcer nga nagtaas ang iya blood pressure, ginpahayag ni Conlu nga may yara sang ginapatigayon nga stress management orientation sa ila.
May mga trainings man sa kun paano i-handle ang kaangay nga sitwasyon.
Base sa internal rules sang talatapan, ang sin-o man nga enforcer nga may violation ang mahimo i-suspend sang tatlo ka adlaw tubtob isa ka bulan, depende sa kabug-aton sang sala, ukon mahimo nga ma-dismiss.
Ang mga violation nga nagaresulta sa dismissal amo ang pagpangilkil kag pagbiya sa duty.
Ginklaro naman ni Conlu nga wala nagreklamo ang driver kag nagpatigayon lamang sang motu-proprio investigation ang talatapan.
Ini ang una nga tion nga na-involve sa kaangay nga sitwasyon ang nasambit nga enforcer.
