ILOILO CITY- Ginkumpirmar sang presidente sang Julix Taxi Transport Corp. nga driver nila ang lalaki nga ginreklamo nga gin-harass ang iya pasahero nga myembro sang LGBTQ community.
Sa interview sang Bombo Radyo kay Mr. Felix Jagolino Jr., iya ginpahayag nga matapos nabatian sa Bombo Radyo ang natuhoy sa reklamo kag nabatian ang pila ka inisyal nga detalye, gilayon siya nga nagduda nga ila driver ang involved.
Ang driver ginkilala kay Leopoldo Estabillo Jr., residente sang Lambunao,Iloilo kag naga-extra lang sa amo nga taxi company.
Suno kay Jagolino, antes niya nabatian ang amo nga reklamo, tatlo ka adlaw na nga wala nakabalik sa garahe ang taxi unit nga gina-drive sang lalaki nga ginareklamo nga nang-harass kag wala naman ini naka-remit.
Pahayag ni Jagolino, sang gin-contact niya ang amo nga driver, didto na nangayo sang pasaylo ang lalaki bangud sa pag-abandonar niya sang taxi unit sa isa ka lodge sa Molo.
Apang suno kay Jagolino,didto na nagpaathag ang driver natuhoy sa naglapta nga video kun sa diin suno sa iya, may transaksyon sila sang iya pasahero kag ginsukot niya ini sang P1,000 apang wala sila nagsugtanay kag gin-alegar niya nga didto na nagsugod sa pagkuha sang video ang tagreklamo.
Dugang ni Jagolino, sa subong,wala na nakapakig-angot sa iya ang driver.
Natalana naman nga magpadulong si Jagolino sa Hunyo 29 sa Land Transportation Franchising and Regulatory Board may kaangtanan sa amo nga insidente bangud involved diri ang ila nga taxi company.
Gin-ako naman ni Jagolino nga wala gid ini nagdumdom nga may problema sa paminsaron ang driver matapos nga nakapamat-ud man sa iya ang iban nga nangin employers sini angot sa indi maayo nga record sang amo nga taxi driver.
