ILOILO CITY- Ginmando na ni Iloilo City Police Office Director PCol Colonel Joeresty Coronica sa Mandurriao Police Station ang pagpadalom sa tanan nga anggulo may kaangtanan sa natabo nga pagpang-harass sang grupo sang armado nga mga lalaki sa Bakhaw, Mandurriao.
Suno kay PCol Coronica, kinahanglan nga matumod ang mga responsable sa insidente ilabi pa nga nabutang sa peligro ang kabuhi sang isa ka pamilya sang ginpahog sila nga pangpatyon sang grupo.
Pahayag ni Coronica, makatilingala nga sa pihak sang amat-amat na nga pagtawhay sang sitwasyon sa Bakhaw, may yara pa sang kaangay nga insidente nga natabo.
Gin-athag naman sang director nga temprano pa nga maghimo sang espekulasyon nga vigilante nga grupo ang may kahimuan.
Nagpasalig naman ini nga may i-deploy nga police personnel sa barangay agud masiguro nga indi masulit ang natabo.
