ILOILO CITY- Ginatipon na sang Iloilo Provincial Health Office ang numero sang mga health workers, senior citizens kag may co-morbidities nga amo ang una nga makabaton sang bivalent vaccines.
Sa interview sang Bombo Radyo kay Dr. Maria Socorro Quiñon, head sang Iloilo Provincial Health Office, iya ginpahayag nga sa health sector, ang i-prioritize amo ang mga pinaka- exposed sa COVID-19 kaangay sang mga na- assign sa COVID ward, triage, emergency room kag mga naga- cater sang pasyente sa rural health unit.
Suno Kay Dr. Quiñon, may nag- abot naman nga bivalent vaccines sa probinsya apang ginapa- hold anay ini sang Department of Health apisar nga may yara na ini sang guidelines.
Liwat naman nga gin-athag ni Dr. Quiñon nga voluntary lamang ang pagpangbakuna kag wala ginapwersa ang tawo.
Matandaan nga ang gobyerno sang Lithuania amo ang nagdonar sang 391,860 doses sang Comirnaty Pfizer-BioNTech-adapted bivalent vaccines sa Pilipinas pinaagi sa World Health Organization-led COVID-19 Vaccines Global Access (COVAX) Facility.
Ang first batch sang bivalent vaccines ang nag- abot sa pungsod sang Hunyo 3 kag maga- expire ini sa Nobyembre bangud may yara lang ini sang anom ka bulan nga shelf life.
