ILOILO CITY- Magapatigayon sang actual data enumeration ang Philippine Statistics Authority Region 6 para sa Census on Agriculture and Fisheries sa Western Visayas.
Ang nasambit nga census ang ginakabig nga pinakadako nga hilikuton sang gobyerno nga may kaangtanan sa pagtipon sang basic information sa agrikultura kag fishery sectors sa Pilipinas.
Ini ang ginabalik matapos ang pulo ka tuig ukon decennial sa diin ini na ang ika-pito nga serye sang decennial agricultural census, kag ika-anum nga decennial census sa fisheries humalin sang 1903 sa pungsod.
Sa interview sang Bombo Radyo kay Nelida Amolar, Chief Statistical Specialist kag officer-in-charge sang Philippine Statistics Authority Region 6, iya ginpahayag nga ginmando ni Presidente Ferdinand “Bongbong” Marcos Jr. ang pagpatigayon sang census agud tipunon ang data sang sektor sang agrikultura kag pagpangisda sa Pilipinas nga mahimo mangin basehan sang mga plano kag programa para sa socio-economic development sang Pilipinas.
Suno kay Amolar, ipaagi sa sample based ang census kun sa diin pilion ang mga respondents kag i-validate sang artificial intelligence ang ginhatag nga impormasyon natuhoy sa agriculture farm, aquaculture ukon fishing operation.
Natalana naman ang enumeration period sa household kag barangay umpisa sa Septyembre 4 tubtob Oktubre 25, 2023.
