ILOILO CITY- Prayoridad sang Iloilo Provincial Ordinance for Renewable Energy ang mga district hospitals sa probinsya sang Iloilo.
Ang Iloilo amo ang labing una sa Pilipinas nga nakabalay sang ordinansa nga naga-promote sa development, utilization, kag commercialization sang renewable energy sources.
Sa interview sang Bombo Radyo kay Iloilo 4th District Board Member Rolando Distura, Principal Author sang nasambit nga ordinansa, iya ginpahayag nga una nga nangin recipient sang 75-kilowatt rooftop solar photovoltaic project balor PHP6.8 million ang Iloilo Provincial Hospital sa Pototan, Iloilo.
Bangud sa nasambit nga proyekto, nagahatag ini sang uninterrupted power supply sa COVID-19 laboratory, Emergency Room kag Operating Room sang ospital sa diin ginabanta P115,000 man kada bulan ang nakinot nila sa electric bill.
Apang wala dira nagatapos sa isa lang ka ospital ang pagpatuman sang ordinansa bangud may yara pa sang tatlo ka mga ospital kaangay na lang sang Dr. Ricardo Y. Ladrido Memorial District Hospital sa Lambunao, Jesus M. Colmenares Memorial District Hospital sa Balasan kag Ramon D. Duremdes District Hospital sa Dumangas nga amo ang gin-identify para sa rooftop photovoltaic installation.
Sa subong suno kay Board Member Distura, nagapadayon naman ang installation sang kaangay nga proyekto sa Aleosan District Hospital sa Alimodian.
Una na nga ginpahayag ni Iloilo Governor Arthur Defensor Jr. nga nagpain sang P30 million nga pondo ang provincial government para sa development samg renewable energy sources subong nga tuig.
Ini bangud nga nasaad sa ordinansa nga dapat kada tuig, magapain sang pondo ang provincial government nga katunga sang 1 percent sang pondo sang national tax allotment sang probinsya.
Apang dugang sang natungdan, indi lang mga ospital ang butangan sang mga kaangay nga proyekto kundi makabenepisyo man ang mga eskwelahan kag mga pasilidad sang Iloilo Provincial Government.
