ILOILO CITY – Nagaplano ang Japan nga magdagdag sang dugang nga economic sanctions sa Russia bangud sa pagsalakay sa Ukraine.
Suno kay Chief Cabinet Secretary Hirokazu Matsuno, diskusyunan sang gobyerno ang mga konkreto nga tikang nga himuon sang Japan kadungan sang penalidad sang Europe kag United States.
Ginalantaw nga ang dugang nga sanctions ang maga-cover sa indi tuman ka mahal nga used cars nga high demand sa Russia.
Humalin sang Abril sang nagligad nga tuig, gindumilian na sang Japan ang pag-export sa Russia sang luxury vehicles nga nagabalor sang masobra 6 million yen ukon P2.3 million.
Ginpakamalaut man ni Matsuno ang pag-isol sang Russia sa deal nga nagapahanugot sa pag-export sang Ukrainian grain pinaagi sa Black Sea.
Upod sa Group of Seven countries kag sang international community, enganyuhon sang Japan ang Russia nga ibalik ang grain export framework.
