ILOILO CITY- Ginduso ni Kabataan Partylist Rep. Raoul Manuel nga sa Iloilo na lang patigayunon ang masunod nga hearing sang House Committee on Public Works and Highways may kaangtanan sa kontrobersiyal nga Ungka kag Aganan Flyovers.
Suno kay Manuel, mas maayo nga hiwaton sa Iloilo ang hearing bangud diri nahamtang ang mga proyekto kag agud mas mabatyagan sang Department of Public Works and Highways ang sense of urgency.
Dugang ni Manuel, kinahanglan nga magpadulong man sa Iloilo agud magtambong sa hearing ang national officials sang Department of Public Works and Highways kag Bureau of Design.
Ipatawag man ang tiglawas sang International Builders Corporation nga kontractor sang proyekto amo man ang third party consultant nga naghimo sang imbestigasyon sa kontrobersyal nga Ungka Flyover.
Antes magtakop ang inquiry, nadesisyunan sa kumitiba nga i-reschedule ang legislative inquiry apang wala pa sang natalana nga petsa.
