ILOILO CITY – Indi pa sigurado ang gobyerno sang Pilipinas kun ang resolution sa United Nations General Assembly nga naga-call out sa pagpang-atake sang China sa exclusive economic zone sang pungsod ang makakuha sang suporta nagikan sa international community.
Ini ang sabat ni Foreign Affairs Secretary Enrique Manalo sa pamangkot ni Kabataan party-list Representative Raoul Manuel kun option lamang ang Senate resolution nga nagapanawagan sa United Nations nga i-call out ang China sa United Nations General Assembly.
Suno kay Manalo, ang resolution sa United Nations General Assembly ang lain nga butang, ginapulitika na kag indi na tuhoy sa legal ukon humanitarian issues gani indi mapaktan kun paano magboto ukon magsuporta ang mga pungsod.
Pahayag pa niya, ang kadalag-an sang Pilipinas sa July 2016 decision sang Permanent Court of Arbitration, nga nagbasura sa expansive claim sang China sa West Philippine Sea, ang bastante na nga legal ground nga magtindog kag indi na kinahanglan nga debatehan kun ang resolution sa United Nations General Assembly ang makakuha sang suporta nagikan sa mayoriya.
Ang pahayag ni Manalo ang ginsuportahan man sang veteran lawmaker kag abogado nga si Edcel Lagman sang Albay.
Suno sa iya, ang desisyon sang korte ang final kag executory kag dapat nga ipatuman.
Apang, gin-athag ni Manalo nga ang resolution ang isa lamang sa mga tikang nga ginhatag sang Senate resolution sa pag-address sang Chinese aggression sa exclusive economic zone sang Pilipinas.
