ILOILO CITY – Nagpanindugan si Foreign Affairs Secretary Enrique Manalo nga wala sang record ang Pilipinas sa anuman nga promisa nga kuha-on ang BRP Sierra Madre sa Ayungin Shoal nga nagaserbe na nga outpost humalin sang 1999.
Sa hearing sang ginaduso nga P23-billion budget sang Department of Foreign Affairs para sa 2024, ginpahayag ni Manalo nga wala pa naka-produce sang kopya sang kasugtanan ang China para sa rundown sang pagkuha sang Navy vessel nagikan sa West Philippine Sea.
Pahayag pa niya, kun wala sang indikasyon sang amo nga agreement, mahimo nga makonsiderar nga wala gid man sang kasugtanan.
Kun balik-balikan, sang nagligad nga semana, gin-akusaran sang Chinese Ministry of Foreign Affairs ang Pilipinas nga nagaplano nga permanante nga magtinir sa Ayungin Shoal kag liwat nga ginmanduan nga kuhaon ang BRP Sierra Madre.
Ini ang pahayag sang China nga kabahin sang ila komento sa statement sang US State Department nga nagapakamalaot sa Beijing bangud sa paggamit sini sang water cannons kag pag-block sang barko sa vessels sang Pilipinas sa resupply mission sa Navy vessel.
Ginpahayag pa ni Manalo nga may yara na sang negosasyon sa China may kaangtanan sa Ayungin Shoal apang wala gin-mention sang Chinese ang kasugtanan nga kuhaon ang BRP Sierra Madre.
Suno naman kay House Deputy Minority Leader France Castro sang ACT Teachers party-list, ang claim sang Chinese government official ang alarming kag indi dapat pagbay-an.
Ginpamangkot naman niya si Manalo kun nakapadala na sang sulat ang Pilipinas sa Chinese Embassy may kaangtanan sa claim sang China.
Suno kay Manalo, bukas sila sa pagpadala sang official letter apang suno sa iya, makapila na ka beses nga ginpangayo sang gobyerno sang Pilipinas ang kopya sang kasugtanan.
