ILOILO CITY – Gin-aresto sang kapulisan sa Thailand ang isa ka 14-anyos nga lalaki kasunod sang natabo nga mass shooting sa isa ka shopping mall sa Bangkok nga nagpatay sa isa ka tawo kag nagpilas sa lima ka iban pa.
Suno sa Metropolitan Police Bureau, nadakpan sang otoridad ang suspek dala ang gingamit sini sa paghimo sang krimen.
Ginpahayag naman ni Dr. Yutthana Setthanan sang Bangkok Emergency Center nga ang napatay nga biktima ang ginapatihan nga isa ka Chinese citizen.
Ang mga pilason naman ang ginabug-usan sang Thai citizens kag foreigners suno kay Yutthana.
Nagpabutyag naman sang pag-unong si Thai Prime Minister Srettha Thavisin sa pamilya sang napatay.
Ginpasalig man niya nga nakahanda siya nga magsuporta sa pamilya sang napatay kag subong man sa mga napilasan.
Kung madumduman, sang Oktubre 2022, 36 ka mga tawo ang napatay sa mass shooting sa isa ka childcare center sa northeastern Thailand.
