Padayunon sang Filipina weightlifter nga si Hidilyn Diaz ang iya target nga makasulod sa ikalima na nga sunod-sunod nga Olympiada paagi sa pagpasakop sa International Weightlifting Federation (IWF) Grand Prix II sa Doha, Qatar subong nga semana.
Maga-compete si Diaz sa women’s -59 kgs buwas nga adlaw, Disyembre 6, kag nagalaum nga mapabilin niya ukon mapasaka pa ang iya world ranking nga No. 7. Ang Top 10 sa amo nga kategorya matapos ang lima ka qualifying meets amo ang maga-abanse sa Paris Summer Games sa France sa 2024.
Si Diaz ang labing-una kag naga-isahanon nga Filipino nga nakahatag sang Olympic gold medal sa Pilipinas kag tuyo sini nga madugangan ang amo nga medalya kun makasaka siya sa Olympiada sa France sa masunod nga tuig.
Pahayag sini, ini na ang iya ikaapat nga qualifier gani nagatutok siya sa kumpetisyon kag ginalikawan ang tanan nga distractions. Antes nagkadto sa Doha, naghanas siya sa Bahrain kaupod ang iya bana kag coach nga si Julius Naranjo.
Indi lamang siya ang naga-isahanon nga weightlifter sang Pilipinas nga malapit na makakuha sang Olympic spot. Sanday anay Asian champion Vanessa Sarno kag Rosegie Ramos ang pareho nga nagapang-siyam sa 49kg kag 71kg kag nagakinahanglan sang isa pa ka tournament kasunod sang grand prix agud nga makatapak sila sa Paris.
Ini nga grand prix sa Doha nga magalawig tubtub sa Disyembre 14 ang makabig nga crucial sa Olympic qualifying rankings sa men’s and women’s division kun sa diin 382 lifters halin sa 72 ka mga pungsod ang nagapaindis-indis agud makakuha sang ticket pakadto sa France.
