ILOILO CITY – Nagpahanumdom si Armed Forces of the Philippines Chief General Romeo Brawner Jr. sa iya staff nga ipatuman sa gihapon ang maximum tolerance apisar sang padayon nga pagpang-atake sang China sa West Philippines Sea.
Sang nagligad nga semana, mismo si Brawner nga sakay sa Unaizah Mae 1 ang naka-witness sang pagpamomba sang tubig sang Chinese Coast Guard kag maritime militia vessels gamit ang cannons kag pagpatigayon sang delikado nga maneuvers batuk sa Philippine resupply team nga padulong sa BRP Sierra Madre.
General Romeo S Brawner Jr visits BRP Sierra Madre (photo from AFP)
Suno kay Brawner, responsibilidad sang isa ka commander nga bisitahan ang iya tropa sa field.
Sa bahin sang Ayungin Shoal, nagpadulong siya didto agud nga makita ang sitwasyon sang personnel kag agud nga mahibaluan niya kun paano ang mga ini suportahan.
Pahayag niya, apisar sang pagpang-atake sang China, nagakadapat sa gihapon nga magsunod ang Pilipinas sa international law.
Gin-athag man ni Brawner nga indi ang Unaizah Mae 1 ang nagbunggo sa barko sang China, kabaliskad sa pahayag sang Beijing.
Ini nga mga insidente ang lakip sa mga na-istoryahan nila ni United States Joint Chiefs of Staff Chairman General Charles Brown Jr. sang Lunes.
Ang duha ang naghisugot nga ipabilin ang “close consultation.”
Lakip man sa mga na-istoryahan amo ang Enhanced Defense Cooperation Agreement sites, ang joint maritime kag air patrols, kag ang ginapatigayon nga Balikatan Exercises.
Suno kay Brawner, nagpasalig ang Estados Unidos nga padayon ang pagbulig sini sa Pilipinas.
Isa sa mga suporta nga ihatag sa pungsod sa tagsa nga magpatigayon sang resupply mission ang Pilipinas amo ang paghatag sang impormasyon.
Ginpahayag man ni Brawner nga mangin si Brown ang nagakabalaka man sa ginahimo nga pagpang-harass sang China.
