Ginkumpirma sang Buckingham Palace nga kinahanglan magtinir sa ospital sa masunod nga semana si King Charles III para sa treatment sa iya nga nagdaku nga prostate.
Suno sa Palasyo, isa ka “corrective procedure” ang himuon kag indi man seryoso ang kondisyon sini.
Gin-anunsyo ang amo nga balita pila ka oras lamang ang makaligad sang gin-anunsyo man nga ang umagad sini nga si Kate nga amo ang Princess of Wales ang nagpaidalom man sa abdominal surgery kag magapabilin sa ospital sa sulod sang duha ka semana.
Naga-edad na sang 75-anyos ang hari kag wala-tuo kuntani ang kaladtuan sini subong nga semana apang tanan ini ang gin-postpone kasunod man sang abiso sang iya doktor.
Sa masami, wala gina-anunsyo sang Royals ang detalye sang ila sakit bangud isa ka pribado nga isyu ang pagpabulong.
Apang suno sa Palasyo, ang hari mismo ang may gusto nga ipakigbahin ini nga detalye bangud luyag sini nga ma-engganyo man ang iban nga mga lalaki nga magpa-check sa doktor pananglitan may yara sila sang mabatyagan nga mga sintomas.
Ginalaragway sang National Health Service sang Britanya ang benign enlarged prostate bilang isa ka kondisyon nga nagaapekto sa pagpangihi sang tawo kag common ini sa mga lalaki nga masobra na sa 50-anyos ang edad.
Septyembre 2022 sang nangin hari si Charles kasunod sang kamatayon sang iya iloy nga si Queen Elizabeth. #
