Posible nga patay na ang beauty queen nga si Catherine Camilon — kun basehan lamang ang mga panugdaon sang mga testigo nga nagabulig sa imbestigasyon sang pulis.
Suno kay Deputy Maj. Nilo Morallos sang Criminal Investigation and Detection Group (CIDG) Region 4-A, nagalaum pa ang pulis sa maayo nga balita sa ila nga imbestigasyon, apang may ginapanan-aw man nga malain nga hitabo.
“Hindi po namin masabi kung wala na po talaga, pero base po sa account ng witnesses namin it appears na ‘yun na nga po, na patay na po,” pahayag sini.
Ang CIDG amo ang primary investigation branch sang Philippine National Police (PNP) kag amo ang nagatutok sa kaso sang missing nga beauty queen nga tumandok sang Tuy, Batangas.
Sang Nobyembre 8, 2023, ginpahayag sang PNP nga may duha ka mga testigo nga nag-claim nga nakit-an nila ang tatlo ka mga lalaki nga nagatuwang sa lawas ni Camilon kag ginsaylo ini sa lain nga salakyan.
Sang Nobyembre 9, sunod man nga na-recover sang mga pulis ang abandonado nga salakyan (kaangay sa ginalaragway sang mga testigo) sa bakante nga lote sa corner sang Dumuclay Road kag Star Tollway sa Barangay Pallocan East.
Base sa resulta sang forensic examination, ang mga unot sang buhok ukon hair strands nga nakuha sa pula nga Honda CRV ang naga-match sa DNA sang ginikanan ni Camilon.
Oktubre 2023 sang gin-report nga missing ang amo nga beauty queen. Tiglawas siya sang Tuy sa Miss Grand Philippines 2023 kag isa man ka teacher sa Batangas.
Kahapon, Enero 18, ginkumpirma man sang Police Regional Office 4A (PRO 4A) nga ginkakas na sa serbisyo epektibo sang Enero 16 ang pulis nga si Police Major Allan de Castro nga amo ang prime suspect sa pagkadula ni Camilon.
Ginpahayag nga ginpahalin ini bangud sa conduct unbecoming of a police office bangud sa gina-alegar pagpakigrelasyon sini kay Camilon apisar nga kasado na ini sa lain nga babayi.
Nagapangatubang man ang amo nga police major sang reklamo nga kidnapping kag serious illegal detention — kaangay man sa ginpasaka sa iya driver-bodyguard nga si Jeffrey Magpantay kag duha pa ka John Does.#
