Ginbawian gid sang kabuhi ang babayi nga estudyante nga isa sa duha ka mga biktima sa nagluntad nga pagpangluthang sa sulod mismo sang Guimaras State University (GSU), Enero 19.
Ang napatay amo si Christine Mae Piamonte, 22, residente sang Barangay Cabungahan, San Lorenzo, Guimaras, kag fourth year student sang Bachelor of Science in Business Administration sa amo nga unibersidad.
Ang isa naman ka biktima nga padayon pa subong nga ginabulong sa ospital amo si Ram Arlo Tacubay, 26, musical director sang nasambit man nga unibersidad para sa Palayag Festival.
Ang suspek naman amo si Zoilo Sereño, 22, anay kahagugma ni Piamonte, residente sang Brgy. Zone 6, Pulupandan, Negros Occidental, kag casual employee sang Rural Health Unit sa amo man nga lugar.
Sa interview sang Bombo Radyo kay Police Major Jefrey Ferrer, hepe sang Buenavista Municipal Police Station, iya ginpahayag nga nakaangkon si Christine sang patal nga pilas sa ulo nga rason sang iya kamatayon.
Kun balikan ang insidente, suno kay Ferrer, nag-ayo ang suspek sa security guard agud magsulod sa unibersidad kahapon sang hapon kag mahatag kuntani sang allowance sa biktima. Naabtan sang suspek si Piamonte kag ang musical director sa Agri-Eco building sang unibersidad, may kumprontasyon nga natabo, kag sang ulihi, nagluntad na ang pagpangluthang gamit ang caliber 38 revolver.
Una nga ginluthang ang lalaki, apang wala ini naigu, gin-agaw sang babayi ang pusil, kag sang ulihi, una pa nga natiruhan ang babayi kag sunod nga gintiro liwat ang lalaki.
Naaresto gilayon ang suspek, nagapabilin sa custodial facility sang Buenavista Municipal Police Station, apang wala gid nakitaan sang paghinulsol sa nahimo nga krimen.
Nahibaluan nga tatlo ka tuig nga magkarelasyon ang suspek kag ang babayi nga biktima antes nagbugnaw na ang pag-updanay sang Nobyembre sang 2023.
CRIME OF PASSION KAG PLANADO?
Ginalantaw naman sang kapulisan nga crime of passion ang natabo.
Suno kay Pol. Col. Rhea Santos, director sang Guimaras Police Provincial Office (GPPO), halin pa mismo sa Pulupandan, Negros Occidental ang suspek dala ang iya nga pusil.
Halin sa Pulupundan, wala ini naglabay sa port kundi nagpakitluoy sa tag-iya sang isa ka pribado nga bangka kag nagrason nga naulanan ini sang gab-i kag kinahanglan gid sini nga magkadto sa Guimaras. Bangud “naluoy” ang tag-iya sang bangka, ginpasakay man siya tubtub nga nakaabot ang suspek sa San Lorenzo.
Pag-abot naman sa gate sang Guimaras State University, ginrason sini sa guwardiya nga mahatag siya sang allowance sa iya girlfriend.
“Kung tan-awon naton ang itsura sang suspek, daw kabuot man lang kag very noble man ang reason ya nga mahatag siya sang allowance. So daw mabulig pa sa eskwela, so human as we are, daw manamian ka man abi eh kay mabulig man siya,” suno kay Santos sa posible rason kun ngaa ginpasulod sa eskwelahan ang amo nga lalaki.
“Siguro sa sobrang gugma niya guro, kun indi man lang sila magkabalikay, indi na lang mapuslan sang iban ang babayi,” dugang pa ni Santos.
Sa isyu naman sa seguridad sa GSU, ginsiling ni Santos nga padalman pa ang imbestigasyon.
Pahayag sini, bisan nga nakalusot ang suspek sa guwardiya sang nagsulod ini sa unibersidad, nagbulig man ang mga guards nga ma-kordon ang area kag indi makapalagyo ang suspek antes maka-reponde ang mga pulis.
OFFICIAL STATEMENT SANG GSU
Sa official statement naman sang GSU nga ginpaguwa Enero 19 sang gab-i, ginsiling sini nga bisan pa nga hugot ang ila nga seguridad, natabo gihapon ang krimen bangud tuman na ini ka planado. Gina-review man subong ang security measures agud indi na matabo liwat ang kaangay nga insidente.
Sa amo man nga statement, ginklaro sang university nga indi nila estudyante ukon alumnus ang 22-anyos nga suspek.
Ginklaro man nga wala sang partisipasyon ang biktima nga si Piamonte sa preparasyon sang eskwelahan para sa Palayag Festival 2024, apang present ini sa campus bangud sa gina-alegar nga kaangtanan sini sa lalaki nga biktima.
Ginpahayag man sang unibersidad nga may ginhatag sila nga financial assistance sa mga biktima kag pamilya kasunod sang hitabo.
Nagapakig-angot man ini sa local government unit sang Buenavista. Dugang pa sini, ginahatag sang unibersidad ang bug-os nga kooperasyon sa imbestigasyon sang kapulisan agud masigurado nga mahatag ang hustisya.
Ginpasalig man nga may ihatag nga counselling kag suporta sa mga indbidwal nga apektado sang natabo sa sulod mismo sang unibersidad. #
