Gin-athag ni Presidente Ferdinand Marcos, Jr. nga wala sang lugar sa “Bagong Pilipinas” ang mga mahigko nga pulitika kaangay sang pagpangguba kag pagpangbutong paidalom.
Sa latest nga vlog sang presidente, ginbalikan sini ang iya speech sa “Bagong Pilipinas” kick-off rally sa Quirino Grandstand sa Manila kag ginsiling nga dapat unahon gid ang interes sang nasyon.
“Sa isang Bagong Pilipinas, walang puwang ang mga paninira at paghahatakan pababa. Unahin natin ang ating bayan. Magbago na tayo dahil walang Bagong Pilipinas kung walang bagong Pilipino,” pahayag sang presidente.
Matandaan nga sang adlaw sang rally nanday Marcos, nagpatigayon man sanday anay President Rodrigo Duterte sang prayer rally sa Davao City kun sa diin gin-akusaran sini si Marcos nga drug addict kag bangag.
Ang anak sini nga si Mayor Baste ang nagtawag man kay Marcos nga tamadan kag nagpanawagan man sa chief executive nga mag-resign na lang sa puwesto. #
