Kaangay sa statement ni President Ferdinand Marcos, Jr. sa iya latest vlog nga wala sang lugar sa Bagong Pilipinas ang mga tawo nga nagapangguba kag nagapang-butong paidalom, amo man sini ang kaundan sang mensahe ni First Lady Liza Araneta-Marcos sa La Union.
Natabo ini sa paglunsar sang medical laboratory services program sa amo nga probinsya kun sa diin naghatag sang speech ang first lady.
“Hindi na po uso ang paninira, hindi na po uso ang pagbabatikos at mga salitang napakasakit. Hindi ganoon ang Pilipino, rich or poor, may class naman tayo ng kaunti,” pahayag sini.
Ginhimo ini nga komento masobra isa ka semana matapos gin-angot siya ni former President Rodrigo Duterte nga amo ang sa likod sa people’s initiative campaign agud amyendaran ang 1987 Constitution. Ang isa pa nga gin-tag ni Duterte amo si House Speaker Martin Romualdez.
Sa amo man nga rally sa Davao City gintawag ni Duterte si President Marcos nga “drug addict” kag “bangag”.
Sa amo nga adlaw, wala man nagpapirde ang anak nga si Davao City Mayor Sebastian “Baste” Duterte kag nagtawag kay Marcos nga “tamad” kag “mag-resign na lang.”
Ang speech naman sang first lady sa La Union amo ang labing-una nga tion nga naghambal ini sa atubang sang publiko kasunod sang speeches sang mag-amay nga Duterte. #
