Nagtanyag ang China sang bulig agud matultulan kag matumod sang otoridad ang hackers nga nagtuyo nga sudlon ang websites sang pila ka ahensya sang gobyerno sa Pilipinas.
Suno kay Department of Information and Communications Technology (DICT) Secretary Ivan Uy, mismo ang China ang nagpakig-angot sa mga opisyal sa Pilipinas kag naghingyo kun pwede sila nga maka-bulig sa problema sang pungsod sa hacking.
Pahayag naman ni Uy, bukas ang Pilipinas nga mag-trabaho sa bisan kay sin-o.
“Yes, actually, they have reached out to ask if we can do some cooperation. Dahil it’s actually both ways. Cooperation has to come, you know, as a mutual activity. So, they are willing to help, they have mentioned that if we can share with them, kung ano iyong nangyari, para mahanap daw nila kung saan at sino iyong gumawa noon,” suno sa tiglikom.
Madumduman nga una na nga ginpahayag sang DICT nga ang Internet Protocol (IP) address sang hackers ang na-trace sa Chinese state-owned telecommunications company nga China Unicom ukon China United Network Communications Group.
Gin-alegar man nga gintuyo sang hackers nga sudlon ang email addresses nga naangot sa DICT, Philippine Coast Guard, National Coast Watch kag mangin ang website ni President Ferdinand Marcos Jr. kag mga Cabinet members.
Sa pihak sini, nagpanginwala man ang Chinese government nga may involvement sila sa amo nga hacking attemps.
Paagi sa ila embahada sa Pilipinas, ginlaragway sang China nga iresponsable ang alegasyon sang Pilipinas kag wala sang husto nga basehan.#
