110 pa ang numero sang missing sa natabo nga landslide sa Zone 1, Brgy. Masara sa banwa sang Maco sa Davao de Oro.
Sandig ini sa pinakaulihi nga datos sang provincial government kun sa diin nakasaad man nga 11 na ang numero sang patay kag 31 ang na-rescue.
Martes sang gab-i sang natabo ang pagtiphag sang duta kun sa diin natabunan pati ang mga balay kag duha ka mga bus nga may sakay nga masobra 20 ka mga pasahero.
Suno pa sa disaster agency sang Maco, yara na subong sa 1,166 ka mga pamilya ang nabakwit halin sa ila nga mga balay.
Ginpahayag man sang Eastern Mindanao Command nga amo ang nagabulig sa rescue operations nga daku ang paglaum sang rescuers nga mas madamo pa sila sang masalbar nga kabuhi apisar pila ka adlaw na ang nagligad halin sang nagluntad ang landslide.
Ang area nga natabuan sang landslide ang nahamtang apat ka kilometros halin sa minahan nga gina-operate sang local companya nga Apex Mining.
Sa statement sang amo nga kumpaniya, ginpahayag nga 62 ang ila naisip nga workers nga yara subong samtang ginapangita naman ang 45 ka iban pa. Una man nga gin-athag sang mining firm nga natabo ang landslide sa area nga guwa na sa mining sute kun sa diin ini naga-operate. #
