Nagdangat na sa 27 ang numero sang patay bangud sang landslide nga natabo sa Masara, Maco, Davao de Oro sang Martes sang gab-i, Pebrero 6.
Suno pa latest report sang provincial government kag Maco Municipal Disaster and Risk Reduction Management Office (MDRRMO), 32 ka mga tawo ang naisip nga pilason samtang gin-revise naman sini ang numero sang missing sa 89 halin sa una gin-report nga numero nga 110.
May 14 ka oras man nga extension sa search and rescue operations matapos nga na-rescue ang tatlo ka tuig nga bata nga babayi kahapon sang aga.
Nalubong man ang lawas sang bata apang may gamay nga portion pa nga nabilin kun sa diin pwede pa ini makaginhawa. Sang nakit-an ini sang rescuers, ginpahayag nga severely dehydrated na ini kag tuman na ka luya.
Ginbansagan man ini nga “The Angel of Masara” kag yara na subong sa estable nga kondisyon.
Sang hapon naman, isa pa gid ka milagro ang natabo bangud na-rescue man ang isa ka duha ka bulan nga bata sandig sa report sang Philippine Red Cross Emergency Response Unit. Nagsuprer ini sang severe diarrhea kag gindala sa Doctors Community Hospital sa Mawab para sa nagakaigu nga treatment.
Ginapadayon subong sang Maco MDRRMO ang search and rescue operations sa bulig sang militar kag iban pa nga search and rescue teams halin sa provincial kag national governments. May sniffer dogs man nga nagabulig agud madasig makit-an kun may mga lawas pa nga nalubong sa duta.
Ang area nga natabuan sang landslide ang nahamtang apat ka kilometros halin sa minahan nga gina-operate sang local companya nga Apex Mining.
Una man nga gin-athag sang mining firm nga natabo ang landslide sa area nga guwa na sa mining site kun sa diin ini naga-operate, apang suno naman sa disaster agency officials, ang amo nga area ang gin-deklarar man sang local government unit nga “no build zone” bangud sang landslides nga natabo man sang 2007 kag 2008.#
(Photo: AP)
