Magasugod na subong nga adlaw, Pebrero 12, ang voter registration para sa 2025 national and local elections.
Suno sa Commission on Elections (Comelec), magalawig ang pagpa-rehistro tubtub sa Septyembre 30, 2024.
Mahimo magkadto sa office of the election officer ukon sa satellite registration sites sa kada area agud nga magpa-register sa pagboto — halin Lunes tubtub Sabado lakip na ang holidays — halin las 8:00 sa aga tubtub las 5:00 sa hapon.
Suspendido naman ang registration sa Marso 28 tubtub sa Marso 30 kaangot sa obserbasyon sang Semana Santa.
Agud makapa-rehistro, kinahanglan nga kumpletuhon sang registrants ang kopya sang sang application form nga pwede makuha sa opisina sang election officer ukon sa website sang Comelec.
Dapat nga mag-presentar man ang registrant sang isa ka government-issued nga identification card, apang gin-athag nga indi pagbatunon sang poll body ang company IDs para sa voter registration.
Ang mga persons with disability, senior citizens, members sang Indigenous People ukon Indigenous Cultural Communities, kag Persons Deprived of Liberty ang mahimo man mag-update sang ila nga record gamit ang supplementary data form.
Yari ang mga application nga pwede ma-file tubtub sa Septyembre 7, 2024:
- Reactivation lamang;
- Reactivation kag may transfer sang registration sa sulod sang amo gihapon nga syudad, banwa, distrito, UKON/KAG may correction sa entries;
- Reactivation kag updating sang records sang senior citizens kag persons with disability
Sa interview sang Bombo Radyo kay Jonathan Sayno, City Comelec Election Assistant II, iya ginpahayag nga ang registration sa Iloilo City ang nahamtang sa 2nd Floor sang Angeles Arcade Building sa Mabini St., Iloilo City.
Para ini sa temprano nga bahin sang registration samtang plano naman sang opisina nga magkadto sa mga unibersidad, malls, kag dalagku nga mga barangay para sa ulihi nga bahin sang registration.
Target sang Comelec nga malab-ot ang tatlo ka milyon nga bag-o nga botante sa bilog nga pungsod agud makapartisipar sa 2025 elections.#
