Gulpyada nga nagsaka sa 54 ang numero sang patay sa landslide sa Barangay Masara, Maco, Davao de Oro sa ikalima nga adlaw sang search, rescue kag retrieval operations.
Magluwas sa masobra 50 nga mga napatay, may yara pa sang 32 nga nasamaran kag 63 pa gihapon ang missing.
Ang rescuers lamang ang ginapasugtan nga makasulod sa area nga natabuan sang landslide ukon ang ground zero bangud sa mga debris nga nagalalapta.
Nakutkot naman ang isa sa duha ka mga bus nga natabunan sang nagtiphag ang duta sang Martes sang gab-i. Ginkumpirma man ni Apex Mining Assistant Safety Manager Rodel Seran nga may tawo pa nga nakit-an sa idalom sang bus apang wala sini ginpatpat kun pila.
Kada makita nga bangkay sa ground zero ang ginatugyan sa local government para matumod sang otoridad ang identity.
Kadam-an sa na-recover nga mga lawas ang nakit-an sang rescue dog nga si Appa nga ginapanag-iyahan sang Coast Guard Southeastern Mindanao.
May mga survivors man nga nagapasalamat sa amo nga ido bangud siya ang nakakita sa ila. Lakip diri amo ang tatlo ka tuig nga bata nga babayi nga natultulan sang ido sang masobra 60 ka oras na ini nga na-trap sa nagtiphag nga duta.
Personal man nga nagbisita si Department of Social Welfare and Development (DSWD) Secretary Rex Gatchalian sa mga survivors agud maghatag sang government assistance.
Ang area nga natabuan sang landslide ang nahamtang apat ka kilometros halin sa minahan nga gina-operate sang local companya nga Apex Mining.
Una man nga gin-athag sang mining firm nga natabo ang landslide sa area nga guwa na sa mining site kun sa diin ini naga-operate, apang suno naman sa disaster agency officials, ang amo nga area ang gin-deklarar man sang local government unit nga “no build zone” bangud sang landslides nga natabo man sang 2007 kag 2008.#
