Gin-report sang Philippine Coast Guard (PCG) nga may walo ka mga Chinese vessels nga nag-sunod-sunod sa barko sang Pilipinas sa Bajo de Masinloc ukon Scarborough Shoal kadungan sang siyam ka adlaw nga pagpatrolya sa amo nga area subong nga Pebrero.
Suno kay PCG spokesperson Jay Tarriela, ang na-monitor sang BRP Teresa Magbanua amo ang apat ka Chinese Coast Guard vessels nga may bow numbers nga 3105, 3302, 3063, kag 3064.
Ang pinakamalapit nga distansya sang Chinese vessel sa sakayan sang Pilipinas ang ginabanta 176 metros suno kay Tarriela. Sa sulod sang siyam ka adlaw, masobra 40 ka beses ini nga nag-ikog sa barko sang Pilipinas.
Magluwas diri, nagpakita na naman ang mga barko sang Chinese Coast Guard sang delikado nga mga maneuvers kag pagbalabag sa BRP Teresa Magbanua sang apat gid ka beses.
Pagpakita ini suno sa opisyal nga ginlapas liwat sang China ang “Convention of the International Regulations for Preventing Collisions at Sea”.
Magluwas diri, nakit-an man sang barko sang PCG ang presensya sang apat ka Chinese Maritime Militia vessels.
Sa pihak sini, ginpakita sang PCG nga propesyunal sila suno kay Tarriela paagi sa paggamit sang radyo kag pagplastar sang posisyon kag panindugan sang Pilipinas sa amo nga teritoryo nga nakasandig sa international law.
Ini nga insidente ang gin-report sang gin-deploy sang PCG ang BRP Teresa sang Pebrero 1 agud siguruhon nga hilway sa katalagman ang mga Pinoy nga manugpangisda sa area.
Ginabanta 100 ka manugpangisda ang yara sa amo nga kadagatan nga may dala nga 14 ka fishing boats.
Ini nga area ang ginakabig nga traditional fishing ground sa lokal nga mga manugpangisda. #
