Gin-report sang Cybercrime Investigation and Coordinating Center (CICC) nga ang bomb threat nga ginpadala sa anum ka mga ahensya sang gobyerno sang Pilipinas ang kumpirmado nga isa lamang ka patalang kag ini nga email ang naghalin sa Japan.
Ang CICC isa ka opisina sa idalom sang Department of Information and Communications Technology (DICT).
Wala sang dapat ikaalarma suno sa executive director nga si Alexander Ramos.
Pahayag pa sang talatapan, ini nga email ang naghalin sa Japan kag ang domain name ang na-rehistro sang lokal sa amo man nga pungsod.
Nagapaninguha na ang Pilipinas sa paghingyo sa gobyerno sang Japan nga imbestigaran man ini kag tumuron kun sin-o ang sender.
Suno pa sa opisina, pila man ka government agencies sa Seoul, South Korea ang nakabaton man sang kaangay nga email sang pulu-pareho lamang nga tion.
Kahapon matandaan nga temprano nga ginpapauli sang Department of Environment and Natural Resources (DENR) ang mga empleyado matapos nabaton ang pamahog apang sang gin-usisa sang pulis, wala man sang bomba sa area.
Nagmandu man si Justice Secretary Jesus Crispin Remulla sa National Bureau of Investigation (NBI) nga magpatigayon sang maid-id nga imbestigasyon kasunod sang amo nga hitabo.
