Nagkuyampad kag halos indi makahibalo kun sa diin makadto ang duha ka kawatan matapos sila nakibot sang naghambal sa closed-circuit television (CCTV) nga amo gali ang tag-iya sang balay kag live sila nga ginalantaw sa ila tuyo nga magpangawat!
Natabo ini sa Naga City, Camarines Sur sang ginsulod sang duha ka lalaki ang isa ka daku nga balay pasado ‘las kuatro sa kaagahon.
Pagkasulod sang duha ka lalaki, nakit-an gilayon nila ang camera gani nag-uba ang isa sang isa nga bayo kag gingamit ini agud tabunan ang nawong. Naka-hoodie naman ang isa ka upod sini nga amo ang nagsaka sa second floor kag ginpatay pa sini ang suga.
Samtang naga-flashlight ang isa ka kriminal sa sala kag nagapangita sang pwede matakab, baw, may naghambal sa CCTV rason nga daw diutayan lang ini ma-heart attack!
Pila pa ka segundos ang nagligad sang nareyalisar sini nga tag-iya sang balay ang naghambal rason nga gintawag sini ang kaupod kag nagdalagan pa-guwa.
Isa ka combat engineer sang militar sa Amerika ang lalaki nga nabatian sa CCTV kag na-access sini ang surveillance camera sa bulig sang internet.
Natukiban sang ulihi nga ginguba sang duha ka lalaki ang padlock rason nga nakasulod sila sa balay. Wala sila sang nabitbit nga bisan ano nga gamit.
Mas ginpahugot naman sang barangay ang ila nga seguridad batok sa mga kawatan kag nagpahanumdom naman ang pulis sa mga pumuluyo nga mag-aligmat gid ilabi na kun may makaduluda nga tawo sa palibot.#
