ILOILO CITY- Ano ang sarang mo himuon sa ngalan sang inyo pag-abyanay?
Masarangan mo bala nga may madula nga parte sang imo lawas?
Kun sabat mo indi… may kilala ako nga pat-ud nga ang sabat niya huo…sa pagkamatuod, nahimo na nila gani nga mag-abyan.
Ini amo sanday Chang kag Liao nga taga- Taiwan.
Isa ka adlaw, nanumdom si Chang kun paano makakwarta bangud kinahanglan gid niya.
Didto nagsulod sa iya pinsar ang butang nga daw ka -imposible apang sa tawo nga wala kwarta, posible.
Kag agud matigayon ini, ginplano nila ini nga mag-abyan kag ang katumanan sang ila plano, i- istorya ko.
Naglagaw sila sa matugnaw nga lugar sa Taepei kag pagbalik, ginpahuluman ni Chang ang iya tiil sa ice sa sulod sang 10 ka oras agud magtig-a kag pagwaon nga nafrostbite ini bangud sa paglagaw sa matugnaw nga lugar kag nagalaum sila nga makakuha sang $1.29 million.
Gindala siya ni Liao sa ospital kag didto na nagdesisyon ang doktor nga utdon ang duha niya ka paa.
Siempre, ginbayaran siya sang insurance company sang dako man nga kantidad tubtob nga nagduda ang otoridad sa ila kag sang gin- imbestigaran, didto na nadiskubrehan, nga gin-peke lang nila ang natabo bisan pa nga nagresulta gid ini sa pagkautod sang mga paa ni Chang.
Natukiban sang prosecutors nga si Chang ang nagapangatubang sang serious financial problems.
Sang Marso 14, pareho nga ginkasuhan sang fraud ang duha apang may dugang si Liao nga kaso bangud sa iya kahilabtanan sa pagpautod sang paa sang iya abyan.
