Apisar sang kahangawa sang publiko sa kondisyon sang iya ikaayong lawas, gin-deliver ni Pope Francis ang iya nga Easter Message kag ang Urbi et Orbi blessing (To the City and the World) kun sa diin partikular nga na-mensyonar ang kinagamo sa Holy Land, Ukraine, Myanmar, Syria, Lebanon, kag Africa.
Sa atubang sang linibo ka mga tumuluo sa St. Peter’s Square sa Vatican, nag-apelar man ang 87-anyos nga Santo Papa sang ceasefire sa tunga sang Israel kag Hamas kag pagpalabay sa humanitarian aid para sa Palestinians sa Gaza.
Naghingyo man ang Santo Papa sang pagbayluhanay sang mga preso sa tunga sang Russia kag Ukraine.
Ginkondena man sini ang human trafficking kag sunod nga nagpangamuyo para sa banas sang kalinong para sa mga tawo nga nagasuprer sang mga kalakasan, kagutom, epekto sang climate change, kag terorismo.
Antes ang iya halos 12 ka minutos nga mensahe para sa Easter Sunday, madamo ang nagakahangawa nga indi ini ma-deliver sang personal sang Santo Papa bangud sa kondisyon sang iya nga ikaayong lawas nga rason man kun ngaa limitado ang iya public speaking kag pagpasakop sa iban nga aktibidad subong nga Semana Santa.
Sa Via Crucis ceremony sang Byernes Santo, nag-atras man ang Santo Papa kag wala na lang nagpartisipar agud nga mahandaan sang maayo ang Easter Sunday.
Sa Easter Sunday vigil service (Sabado sang kaagahon oras sa Pilipinas) nga naglawig sang duha ka oras, nagpanguna na liwat ang Santo Papa apang talalupangdon kun kaisa nga daw ginahapo ini samtang nagahambal.
Matandaan nga wala man nagpartisipar si Pope Francis sa “Via Crucis” sang 2023 apang napahibalo ini sang abanse bangud na-ospital ini bangud sa bronchitis kag pila ka semana ang nagligad, nagpaidalom pa ini sa hernia operation.
Ang natabo sang nagligad nga Byernes Santo nga hinali nga pagkanselar sini sa iya nga partisipasyon sa prusisyon ang nagtuga man sa mga pamangkot sang publiko kun ano kadugay pa sini masarangan nga pamunuan ang Catholic Church kag ang 1.3 billion followers sini.#
