Gin-ako sang militar sang Israel nga isa ka “sala” ang ila ginhimo nga airstrike nga rason sang kamatayon sang aid workers sang non-profit nga World Central Kitchen sa Gaza.
Suno kay Israeli Defence Forces chief Herzi Halevi, isa ka “grave mistake” ang ila nahimo kag wala dapat natabo apang may yara sang “misidentification” bangud gab-i sang nagluntad ang insidente.
Sa statement ni Israeli Prime Minister Benjamin Netanyahu, gin-ako man sini nga “inosente” nga mga tawo ang gin-igu sang ila nga militar kag ginlaragway man ang hitabo nga “tragic” kag indi man hungod.
Nagpasalig man ini nga gina-kontak na nila ang iban nga mga pungsod kun sa diin nagapauli ang mga biktima kag nagpasalig man nga indi na ini matabo liwat.
Talalupangdon man nga bisan amo sini ang statement ni Netanyahu, wala ini nagpangayo sang pasaylo.
Pito ang patay sa amo nga airstrike lakip ang Australian, British, Palestinian, Polish kag US-Canadian staff sang nasambit nga charity.
Nahibaluan nga halin sang natabo ang gyera sa Gaza sang Oktubre 2023, ang amo nga charity nga naka-base sa Estados Unidos sang Amerika ang nagapakaon na sa mga tawo nga wala sang puluy-an.
Antes natabo ang pagpatay sa ila sang Lunes, bag-o lang gid nila nadiskarga ang masobra 100 ka tonelada nga pagkaon nga gindala sa Gaza paagi sa barko.
Madamo nga world leaders ang nagahingyo sang imbestigasyon kasunod sang insidente — lakip si US President Joe Biden — kag nagmandu man nga pasabton ang may responsibilidad sa hitabo.
Ginsiling naman ni UN Secretary-General Antonio Guterres sa atubang sang General Assembly nga 196 na ka humanitarian workers ang napatay halin sang nagsugod ang Israel-Hamas war. #
(Mohammed Saber/EPA-EFE/Shutterstock)
