Gindumilian ang mga soldado sang Israel nga mag-leave kag ginpasaka man sa high alert ang defense command agud nga makabato pananglitan may missile ukon drone attack ang Iran.
Magluwas diri, ginpatawag man ang reservists agud nga mas mapabaskog pa ang ila nga air defense units.
Gin-block man ang Global Positioning System (GPS) sa central nga portion sang pungsod agud nga ma-disrupt ang missiles kag ang drones. Ini ang rason kun ngaa may pila ka Israeli citizens nga indi mahimo makagamit sang location-based app services sa major cities kaangay sang Tel Aviv kag Jerusalem nga malayo man sa active combat zones.
Matandaan nga nagpaandam ang Iran nga magatimalos sila matapos ang airstrike sang Israel sa Iranian consulate sa Damascus, Syria sang nagligad nga adlaw kun sa diin masobra 10 ka mga tawo ang napatay lakip na ang military advisers kag senior commanders sang al-Quds force sa Islamic Revolutionary Guards Corps.
Ginapatihan sang Israeli authorities nga idungan sang Iran ang ila balos sa Quds Day – ukon ang Jerusalem Day – nga amo ang katapusan nga Byernes sa Muslim holy month sang Ramadan. Ini man nga adlaw ang masami ginatalana ang pro-Palestinian kag anti-Israel rallies ilabi na sa Iran.#
