Ginpuhag sang 4.8 magnitude nga linog ang New York City kag ang kaiping nga mga lugar pasado 10:00 Byernes sang aga (oras sa amo nga lugar).
Suno sa United States Geological Survey, ang sentro sini amo ang Reddington Township sa New Jersey nga 40 miles west sang New York City.
Wala sang na-report nga major disruptions sa New Jersey kag sa New York magluwas lang sa pag-uyog sa mga building lakip na sa building sang UN Security Council kun sa diin na-interrupt ang meeting sang mga opisyal.
Gin-shut down man ang air traffic sa major airports sa north-east sang US apang ginpabalik naman ang flights.
Suno kay New Jersey Gov. Phil Murphy, activated na subong ang State Emergency Operations Center.
Pahayag naman ni New York Gov. Kathy Hochul, nabatyagan ang linog sa bilog nga New York kag padayon nga gina-assess sang mga opisyal ang epekto kag halit ilabi na sa posible matabo nga aftershocks.
Ginpaathag sang gobernador nga 2011 pa sang ulihi nabatyagan ang amo nga magnitude sang linog sa ila lugar rason nga napuhag gid ang mga tawo.
‘Under control’ ang sitwasyon suno naman kay US President Joe Biden kag magapadayon naman ang White House sa pagmonitor sa sitwasyon.#
(AP Photo/John Minchillo)(John Minchillo / ASSOCIATED PRESS)
