Nagpaathag ang Land Transportation Franchising and Regulatory Board (LTFRB) nga nagahulat ini sang mandu halin sa Department of Transportation (DOTr) kaangot sa P1.6-billion fund para sa subsidiya sa public transportation sector sa tunga sang nagasaka nga presyo sang produktong petrolyo.
Una na nga ginpahayag sang Department of Energy (DOE) sang Marso nga dapat nga ipatuman na ang subsidy program kun ang presyo sang krudo ang magalapaw sa $80 ukon masobra P4,500 per barrel.
Ang operators kag drivers sang modern jeepneys ang mahimo makabaton sang P10,000 nga balor sang fuel subsidy sa idalom sini nga programa; samtang ang buses, mini buses, school buses, taxis, kag traditional jeepneys naman ang makabaton sang balor P6,500 nga fuel subsidy.
Ang delivery riders naman ang may palaabuton nga P1,200 fuel subsidy samtang P1,000 naman sa mga driver sang tricycle.
Suno kay LTFRB Chairperson Teofilo Guadiz III, abiso na lang sang DOTr ang ginahulat para mahatag sa ila ang pondo kag mapanagtag ang ayuda.
“Meron batas that if the price of crude oil breaches 80 dollars per barrel, it will trigger the release of the fuel subsidy. Now, we are waiting for the advice from the DoTr para ibigay sa amin ang pondo para sa fuel subsidy,” suno kay Guadiz.
Nahibaluan nga sa baylo nga subsidiya, nagahingyo ang pila ka drivers sang jeep nga saka sa plete ang ipatuman bangud sa sunod-sunod nga price hike sa gatong.
