ILOILO CITY-Ginsentensiyahan sang 18 ka bulan nga pagkapreso ang isa ka Polish priest bangud sa kaso may kaangtanan sa sex kag drug crimes.
Ang pari amo si Grzegorz Kaszak nga gindagdagan sang silot bangud sang sexual offences, pag-supply sang druga kag kapaslawan nga maghatag sang assistance sa tawo nga yara sa ital- ital ang kabuhi.
Ginapabayad man ini sang ($3,820) sa damages kag dugang nga kwarta para sa pondo nga ginagamit sa mga biktima sang krimen.
Bangud sa nature sang kaso, nangin pribado man ang trial sini.
Ginpahayag nga wala na sang appeal kasunod sang sentensiya sa iya.
Nahibaluan nga nabutang sa eskandalo ang Diocese of Sosnowiec sa southwest Poland kasunod sang naglupok nga balita nga may natabo nga sex party sa banwa sang Dabrowa Gornicza.
Sang amo nga tion, nagpanaog sa pwesto ang bishop sang diocese nga wala sang ginplastar nga rason para sa iya resignation.
Si Kaszak ang ginsipa man sa simbahan sang nagligad nga tuig kasunod sang eskandalo.
Suno kay Bombo Neva Intrepido-Kessler, international correspondent sa Poland, nag-ugat ang kaso sang may isa ka insidente kun sa diin may lalaki nga ginapahayag nga nag-collapse sa isa ka orgy sa balay sang pari bangud ginpainom niya ini sang erectile dysfunction pills.
