Nalakip ang isa ka obispo sa apat ka mga tawo nga nabun-an kadungan sang isa ka sermon sa simbahan nga gina-stream online sa Australia.
Natabo ini nga insidente pasado ‘las syete Lunes sang gab-i sa Christ The Good Shepherd Church sa Wakeley, western Sydney.
Ang gin-atake nga obispo ang ginpangalanan sang local media nga si Mar Mari Emmanuel kag ini nga identity ang ginkumpirma man sang simbahan nga Eastern Orthodox. Gindugang man sang simbahan sa isa ka statement nga may isa pa ka pari nga si “Father Isaac” nga nasamaran man kag gindala na sa ospital.
Suno pa sa pulis, wala sang seryoso nga samad nga naangkon ang mga mga biktima.
Arestado man ang wala pa nahingadlan nga 15-anyos nga suspek apang ginahibalo pa kun ano ang motibo sini kag kun ano nga patalom ang iya gingamit sa krimen.
Pagkatapos sang atake, nagtipon ang ginabanta 2,000 ka akig nga mga tawo malapit sa simbahan kag nabudlayan naman ang mga pulis nga mapabilin ang kalinong.
Ang lugar nga natabuan sang krimen ang nahamtangan man sang gamay nga Christian Assyrian community sa Sydney kun sa diin kadam-an sa ila ang nagpalagyo gikan sa persecution kag gyera sa Iraq kag Syria.
Madamo ang naalarma sa sini nga hitabo ilabi na bangud natabo ini pila ka adlaw kasunod sang mass stabbing sa isa ka shopping mall sa amo man nga syudad sa Australia kun sa diin anum ka tawo ang napatay. Patay man ang suspek sa amo nga hitabo.
Wala pa sang kaathagan kun magkaangot ang duha ka nasambit nga mga insidente.
