Gin-umpisahan na ang madugay na ginahulat-hulat nga hush-money criminal trial para kay anay US President Donald Trump sa New York sa Estados Unidos sang Amerika.
Maragtason ini nga trial bangud ini ang labing-una nga tion nga ang isa ka presidente sang Amerika —former man ukon nagapungko pa sa posisyon — ang napasakaan sang kaso-kriminal.
Sa diri nga kaso, ginatudlo si Trump nga nag-cover up sa $130,000 ukon P7.4-million nga hush-money payment sa porn star nga si Stormy Daniels antes ang 2016 election kun sa diin naeleher ini sa pwesto.
Gin-alegar ni Daniels nga nakighilawas sila ni Trump sang 2006 apang ginbayaran siya sang abogado sang anay presidente agud maghipos.
Gin-akusahan man si Trump sa pagpeke sang iya nga business records paagi sa pagsiling nga ang reimbursement money nga ginhatag sini sa iya abogado ang para sa legal fees.
34 ka counts sang fraud ang gina-atubang ni Trump apang ginpanginwala niya ini pati na ang affair sa kay Daniels. Ang maximum penalty kun mapamatud-an nga guilty amo ang apat ka tuig nga pagkapreso.
Posible nga duha ka semana ang kalawigon sang trial apang gintawag ini ni Trump nga “scam” kag “politically motivated”.
Naga-reklamo man ini bangud indi siya pagtugutan sang korte nga magtambong sa high school graduation sang iya nga anak amo man sa Supreme Court arguments sa kun bala may yara siya sang presidential immunity sa separado nga criminal case sa federal court sa Washington, D.C.#
Charly Triballeau / AFP – Getty Images
