MIAGAO, ILOILO – Ginalauman nga mas magasanyog pa ang weaving industry ukon ‘pag-habol’ sa Western Visayas.
Sa interview sang Bombo Radyo kay Rowen Gelonga, Director sang Department of Science and Technology Region 6, iya ginpahayag nga napilian nila sang Iloilo Science and Technology University (ISAT-U) ang Barangay Baraclayan, Miagao, Iloilo bilang recipient sang proyekto agud mas mapanami pa ang industriya sang pag-habol.
Suno kay Gelonga, P5 million ang pondo sang nasambit nga proyekto nga ginalakipan sang weaving facility nga isa sa mga components sang Natural Fiber and Textile Development Initiatives.
Pinaagi sini suno kay Gelonga, mabuligan ang palangabuhian sang mga pumuluyo sa barangay.
Ang nasambit nga weaving center ang ginalauman nga magabulig sa operasyon sang Regional Yarn Production and Innovation Center sa sulod sang ISAT-U Campus sa Miagao.
Suno naman kay Miagao, Iloilo Mayor Richard Garin, kada adlaw masarangan sang tagsa ka manug-habol nga makahimo sang walo ka metro sang hablon.
Plano naman nila nga magbakal sang dugang nga mga makina agud makabulig sa pagpanahi sang mga ready-to-wear nga mga panapton.
Una diri, naghatag naman ang Department of Social Welfare and Development (DSWD) sang 100 ka mga wooden handlooms sa walo ka mga weaving communities sa nasambit nga banwa.
