ILOILO CITY — Nagsaka sang P1.02 per kilowatt hour ang electricity rate sang MORE Electric and Power Corporation sugod Mayo 18, 2024 tubtob Hunyo 12, 2024.
Sa interview sang Bombo Radyo kay Mr. Niel Parcon, Vice President sang Corporate Energy Sourcing and Regulatory Affairs sang MORE, iya ginpahayag nga ang pagsaka sang electricity rate amo bangud sa pagsaka sang presyo sang ginabakal nga kuryente halin sa power supppliers nga gintalana sang Wholesale Electricity Spot Market.
Suno kay Parcon, seasonal man ang demand sang kuryente, sa diin, kun lamig, gamay ang kinahanglanon nga power supply, samtang kun init naman, mas madamo ang kinahanglanon nga elektrisidad.
Ginpahayag man ni Parcon nga ang presyo nga ginsaka ang manubo na kun ikumpara sa iban nga mga kooperatiba sang kuryente.
Nagpanugyan naman ang natungdan nga kun tuyo gid sang mga konsomidor nga magnubo ang presyo sang kuryente, kinahanglan man nga maghagan-hagan sa paggamit sang mga appliances.
Wala naman nagpasalig ang kooperatiba kun may tsansa nga magnubo ang kuryente subong nga summer season bangud nagapadayon man ang pag saka sang heat index sa syudad.
Sa subong, yara na sa P11.33 per kilowatt hour ang presyo sang kuryente para sa mga konsumidor sang MORE Electric and Power Corporation.
