Napatay ang isa ka pasahero kag nasamaran ang 71 ka iban pa nga sakay sa eroplano sang Singapore Airlines bangud sang mabaskog nga turbulence sa flight nga halin sa London.
Na-identify ang ginbawian sang kabuhi nga amo ang 73-anyos nga British national nga posible nagsuprer sang heart attack.
Sa una nga impormasyon halin sa airlines, 30 ka mga pasahero ang nasamaran apang sa latest nga update sang ospital, nagsaka ang numero sa 71 kun sa diin nalakip ang mga citizens sang Malaysia, the United Kingdom, New Zealand, Spain, the United States kag Ireland. Kumpirmado man nga may lima ka Pilipino sa flight.
Anum sa ila ang may severe injuries nga mas manubo sa nauna nga report sang kumpaniya nga pito gid ang critically injured bangud sa insidente.
“Singapore Airlines offers its deepest condolences to the family of the deceased. We deeply apologize for the traumatic experience that our passengers and crew members suffered on this flight,” pahayag sang airline kag nagpasalig nga ihatag ang tanan nga nagakaigu nga assistance sa mga biktima.
Nahibaluan nga nagaserbe ang cabin crew sang breakfast sang na-encounter ang turbulence sa Boeing 777-300ER plane rason nga nag-request ang mga piloto sang emergency landing sa Bangkok, Thailand 3:45p.m. local time.
Sakay sa eroplano ang 211 ka mga pasahero kag 18 ka crew.
Pagkahugpa sang eroplano, nakit-an nga kalabanan sa mga pasahero ang nagreklamo sa pagkabali sang ila nga mga butkon, napilasan kag nabagrasan, kag nagkalabunggo ang ulo.
Sa mga laragway sa sulod sang eroplano, nakit-an man ang gas masks kag panels nga nagakabit sa ceiling samtang nagalalapta naman ang items sang hand luggage.
Suno naman sa aviation tracking site nga FlightRadar24, base sa nakit-an sa data, ang turbulence sa Singapore Airlines flight SQ321 ang natabo sang yara malapit sa Irrawaddy Basin sa Myanmar nga 37,000 ka tapak ang kataason sang lupad sang aircraft kag 10 ka oras ang nakaligad sa ila nga departure. Sa data sang aviation tracking site, halos nagalukso-lukso na ang eroplano sang ginatos ka tapak sa sulod sang 90 segundos antes ini nagbalik sa husto nga cruising altitude.
Lakip sa naghatag sang mensahe sang simpatiya sa pamilya sang napatay amo ang transport officials kag mangin si Singapore President Tharman Shanmugaratnam.
“We do not have the details of those affected, but know that the government ministries and agencies, as well as SIA, are doing their utmost to support all those affected and working with the authorities in Bangkok, where the plane had been diverted to,” kabahin sang pahayag ni Shanmugaratnam.#
