Nasamaran ang 12 ka mga tawo sang naka-eksperyensya sang turbulence ang Qatar Airways flight nga halin sa Doha, Qatar kag pakadto sa Dublin, Ireland.
Sa statement sang Dublin Airport, anum ka mga pasahero kag anum ka crew ang injured kag walo diri ang gindala sa ospital kasunod sang inisyal nga assessment.
Ginsaad man nga natabo ang turbulence sa Qatar Airways flight QR107 sang yara ini nagalupad sa hurisdiksyon sang Turkey.
Ginkumpirma naman sang Qatar Airways nga safe ang ila nga paghugpa sa Dublin kag ginpasalig man nga hatagan sang assistance ang mga pasahero kag crew samtang nga magasunod ang internal investigation.
Ini nga insidente ang natabo pila ka adlaw matapos nasamaran man ang masobra 100 ka tawo kag napatay ang isa ka British national bangud sa severe turbulence sa isa ka byahe sang Singapore Airlines nga halin sa London.
