Ginkumpirma sang Office of Civil Defense (OCD) nga may na-report na nga lima ka mga indibidwal nga nagkalamatay samtang pito ang napilasan bangud sa paglaslas ni Bagyo Aghon.
Suno kay OCD Spokesperson Edgar Posadas, gina-validate pa subong sang opisina ini nga numero sang casualties.
Sa inisyal nga impormasyon, nalakip sa mga napatay ang isa ka pito-ka-bulan nga lapsag sa Padre Burgos, Quezon nga gin-anod sang mabaskog nga tubig-baha sang Sabado sang gab-i.
Sa separado nga data sang Philippine National Police, tatlo sa mga napatay ang lunsay halin sa Quezon kun sa diin magluwas sa lapsag, may lalaki man nga natumbahan sang puno sang acacia sa San Antonio kag isa ka 14-anyos nga solterito nga natumbahan man sang kahoy sa Lucena City.
Sa pito naman ka naka-angkon sang injuries, ginapahayag nga apat ang halin sa Legazpi, Albay kun sa diin nalakip man ang tatlo ka mga menor de edad kag isa nga natumbahan sang kahoy.
Base sa pinakaulihi nga situational report sang National Disaster Risk Reduction and Management Council, masobra 8,400 ka mga pamilya ang apektado sang bagyo kag masobra naman sa 5,000 ang na-displace nga subong nagatinir anay sa halos 100 ka mga evacuation centers.
May na-deklarar na nga state of calamity sa Lucena City, Quezon. Ginpahayag man sang Quezon Provincial Disaster Risk Reduction and Management Office nga mahimo man ipaidalom sa calamity status ang first kag second districts sa probinsya nga may 20 ka mga banwa kasunod sang daku nga epekto sang bagyo. Istoryahan ini sa meeting sang provincial government subong nga adlaw, Mayo 28.
Sa bahin sang Department of Social Welfare and Development, nakahatag ini sang P5-million nga balor sang standby funds sa CALABARZON nga isa sa mga rehiyon nga ginlaslasan sang bagyo.
