ILOILO CITY- Ginmando sang Supreme Court nga sayluhon sa Quezon City Regional Trial Court halin sa Davao City Regional Trial Court ang child abuse kag sexual abuse cases ni Kingdom of Jesus Christ leader Pastor Apollo Quiboloy.
Suno sa Supreme Court, gin-grant sang Second Division ang request ni Justice Secretary Jesus Crispin Remulla nga sayluhon ang venue sang duha ka mga kaso, pursuant sa iya constitutional power nga magmando sang pag-ilis sang venue agud malikawan ang miscarriage of justice.
Pahayag sang Supreme Court, may yara sang rason nga ma- justify ang pag- transfer sang venue bangud nga ang kaso naga-involve sang public interest, kag si Pastor Quiboloy ang kilala kag maimpluwensiya nga religious leader sa Davao.
Una na nga ginhingyo sang Justice Department ang Supreme Court nga sayluhon ang child abuse kag sexual abuse cases ni Quiboloy kag sang iya co-accused para sa violation sang Special Protection of Children Against Abuse, Exploitation and Discrimination Act nga ginpasaka sa Davao City Regional Trial Court.
Ginmanduan sang Supreme Court ang Clerk of Court sang Davao RTC Branch 12 nga ipasa ang tanaan nga records sang kaso sa Office of the Executive Judge sang Quezon City RTC sa sulod sang tatlo ka adlaw humalin sang naggwa ang notice.
